Pro 5 | NdeIBE | STEP | Ndodana yami, nanzelela ukuhlakanipha kwami, ulalele kuhle amazwi ami alombono,

Proverbs 5

1 Ndodana yami, nanzelela ukuhlakanipha kwami, ulalele kuhle amazwi ami alombono,

2 ukuze uhlale ukwazi ukukhetha okuqondileyo lokuze izindebe zakho zigcine ulwazi.

3 Phela izindebe zesifebekazi zithonta uluju, lenkulumo yaso iyatshelela kulamafutha;

4 kodwa ekucineni iyababa ingathi yinyongo, ibukhali njengenkemba esika nxa zombili.

5 Izinyawo zaso zehlela ekufeni; izinyathelo zaso ziqonda nta elibeni.

6 Kasikhathali ukuthi kuphilwa njani; izindlela zaso ziyazombeleza, kodwa kasikuboni lokho.

7 Ngalokho-ke, madodana ami, ngilalelani; lingaphambuki kulokho engikukhulumayo.

8 Hambani ngendlela ekhatshana kwaso, lingasondeli emnyango wendlu yaso,

9 funa unikele kwabanye amandla akho wonke lobudala bakho kulowo olesihluku,

10 funa abemzini bazitike ngenotho yakho lokusebenza kwakho kunothise umuzi wenye indoda.

11 Ekupheleni kokuphila kwakho uzabubula, lapho inyama yakho lomzimba wakho sekugugile.

12 Uzakuthi, “Uthi ngangikuzonda yini ukulaywa! Inhliziyo yami yayikuzonda njani ukuqondiswa!

13 Ngangingafuni ukulalela abafundisi bami kumbe ukulalela abeluleki bami.

14 Sengifike kongqe ngiphakathi kukazulu wonke.”

15 Natha amanzi kowakho umgqomo, amanzi agelezayo kowakho umthombo.

16 Kambe imithombo yakho iyekelwe igeleza emigwaqweni, lezifula zakho zamanzi zigelezele ezinkundleni zabantu na?

17 Kazibe ngezakho wena wedwa, ungazabelani labafokazana nje.

18 Sengathi ungabusiswa umthombo wakho njalo sengathi ungathokoza ngomfazi wobutsha bakho.

19 Oyimpalakazi ethandekayo, imbabala ebutshelezi – amabele akhe sengathi angakusuthisa lanini, nini lanini ukhangwe luthando lwakhe.

20 Hawu, ndodana yami, kungani uthunjwa yisifebekazi? Kungani ugona iqolo lomfazi wenye indoda?

21 Phela izindlela zomuntu zithe bha kuJehova, uyahlola zonke izindlela zakhe.

22 Izenzo ezimbi zomuntu omubi ziyamthiya; izibopho zesono sakhe zimuthe nko.

23 Uzabhubha ngoba engalayeki, elahlekiswa yibuphukuphuku bakhe.